ന്യൂഡല്ഹി: അഴിമതി ആരോപണത്തെ തുടര്ന്ന് പാര്ലെന്റിന്റെ ഇംപീച്ച്മെന്റ് നടപടികള് നേരിടുന്ന കര്ണാടക ഹൈക്കോടതി ചീഫ് ജസ്റ്റിസ് ജസ്റ്റിസ് പി.ഡി. ദിനകരനെ സിക്കിം ഹൈക്കോടതിയിലേക്ക് സ്ഥലംമാറ്റി. സുപ്രീംകോടതി ചീഫ് ജസ്റ്റിസ് എസ്.എച്ച് കപാഡിയയുമായി നടത്തിയ കൂടിയാലോചനയ്ക്ക് ശേഷമാണ് രാഷ്ട്രപതി പ്രതിഭാപാട്ടീല്, ദിനകരന്റെ സ്ഥലംമാറ്റകാര്യത്തില് തീരുമാനം എടുത്തതെന്ന് നിയമമന്ത്രാലയം വിജ്ഞാപനത്തില് അറിയിച്ചു. ദിനകരനെ സുപ്രീംകോടതി ജഡ്ജിയായി നിയമിക്കാന് കഴിഞ്ഞ വര്ഷം കൊളീജിയം ശുപാര്ശ ചെയ്തിരുന്നു. എന്നാല്, ഭൂമി കയ്യേറ്റം ഉള്പ്പെടെയുള്ള അഴിമതി ആരോപണങ്ങള് ഉയര്ന്നതിനെ തുടര്ന്ന് ദിനകരന്റെ നിയമനത്തെ ഒട്ടേറെ ജഡ്ജിമാരും അഭിഭാഷകരും എതിര്ക്കുകയായിരുന്നു. തുടര്ന്ന് കൊളീജിയത്തിന്റെ ശുപാര്ശ കേന്ദ്രസര്ക്കാര് മടക്കി. ഒടുവില് ദിനകരനെ സിക്കിമിലേക്ക് സ്ഥലം മാറ്റാന് കൊളീജിയം കേന്ദ്രസര്ക്കാരിനോട് ശുപാര്ശ ചെയ്യുകയായിരുന്നു.
