തിരുവനന്തപുരം: നൂറ്റിയെണ്‍പതോളം യാത്രക്കാരുമായി നെടുമ്പാശേരിയില്‍ നിന്നും പുറപ്പെട്ട എയര്‍ ഇന്ത്യയുടെ ദോഹ വിമാനം അധികൃതരുടെ അനാസ്ഥമൂലം യാത്ര തുടരാനാകാതെ തിരുവനന്തപുരം വിമാനത്താവളത്തില്‍ കുടുങ്ങി. നെടുമ്പാശേരിയില്‍ നിന്നും പുറപ്പെട്ട്‌ തിരുവനന്തപുരം, ബഹ്‌റിന്‍ വഴി ദോഹയിലേക്കുള്ള എയര്‍ ഇന്ത്യയുടെ ഐഎസ്‌ നാനൂറ്റി അമ്പത്തിയേഴാം നമ്പര്‍ വിമാനമാണ്‌ ഇനിയും യാത്ര തുടരാനാകാതെ തിരുവനന്തപുരം വിമാനത്താവളത്തില്‍ കുടുങ്ങിക്കിടക്കുന്നത്‌. വിമാന ജീവനക്കാരുടെ ഡ്യൂട്ടിസമയം അവസാനിച്ചതാണ്‌ യാത്ര മുടങ്ങാന്‍ കാരണം. ഇന്നലെ രാത്രി 8:50 ന്‌ പുറപ്പെടേണ്ട വിമാനം ഇന്ന്‌ മൂന്ന്‌ മണിക്കേ പുറപ്പെടുവെന്ന്‌ അധികൃതര്‍ അറിയിച്ചു. വിമാനത്തില്‍ നിന്നും ഇറങ്ങാന്‍ കൂട്ടാക്കാതെ യാത്രക്കാര്‍ പ്രതിഷേധവും ആരംഭിച്ചു. അപ്രതീക്ഷിതമായി യാത്ര മുടങ്ങിയതിനാല്‍ യാത്രക്കാരും ദുരിതത്തിലായിരിക്കുകയാണ്‌. വിസ കാലാവധി ഇന്ന്‌ അവസാനിക്കുന്ന യാത്രക്കാരും ഇക്കൂട്ടത്തിലുണ്ട്‌. മസ്‌കറ്റില്‍ നിന്ന്‌ വരുന്ന വിമാനമാണ്‌ വൈകിട്ട്‌ 7.05 ന്‌ കൊച്ചിയില്‍ നിന്ന്‌ തിരികെ ദോഹയിലേക്ക്‌ പോകുന്നത്‌. ഏതാണ്ട്‌ അഞ്ച്‌ മണിക്കൂര്‍ വൈകിയാണ്‌ വിമാനം മസ്‌കറ്റില്‍ നിന്ന്‌ കൊച്ചിയില്‍ എത്തിയത്‌.സമയക്രമം അനുസരിച്ച്‌ 8.50 നായിരുന്നു ഈ വിമാനം തിരുവനന്തപുരത്ത്‌ എത്തേണ്ടത്‌. എന്നാല്‍ 11.40 നാണ്‌ വിമാനം തിരുവനന്തപുരത്ത്‌ ലാന്‍ഡ്‌ ചെയ്‌തത്‌. 12.20 ഓടെ യാത്ര തുടരുമെന്ന്‌ അറിയിച്ചെങ്കിലും ഡ്യൂട്ടി സമയം തീര്‍ന്നതായി ജീവനക്കാര്‍ അറിയിച്ചതോടെ യാത്ര തുടരാനാകാത്ത സ്ഥിതിയിലെത്തുകയായിരുന്നു. പുലര്‍ച്ചെ മൂന്ന്‌ മണിയോടെ യാത്ര തുടരാമെന്ന്‌ അധികൃതര്‍ ആദ്യം പറഞ്ഞെങ്കിലും പിന്നീട്‌ പതിനെട്ട്‌ മണിക്കൂറിന്‌ ശേഷമേ പോകാന്‍ കഴിയൂ എന്ന നിലപാടിലാണിപ്പോള്‍. മസ്‌കറ്റില്‍ നിന്ന്‌ തന്നെ വൈകിയെത്തിയ വിമാനത്തില്‍ പകരം ജീവനക്കാരെ ഏര്‍പ്പെടുത്താന്‍ ആവശ്യത്തിന്‌ സമയമുണ്ടായിരുന്നെന്നും എന്നാല്‍ അധികൃതരുടെ അനാസ്ഥയാണ്‌ യാത്ര മുടങ്ങാന്‍ കാരണമെന്നും യാത്രക്കാര്‍ ഒന്നടങ്കം ആരോപിച്ചു.